“მითხრეს, რომ ეს სამუდამოდ საიდუმლოდ უნდა შემენახა" - რას ჰყვება ქალი, რომელიც აცხადებს, რომ ილონ მასკის მე-13 შვილის დედაა
ინფლუენსერი ეშლი სენტ კლერი, რომელიც ამტკიცებს, რომ ილონ მასკის მეცამეტე შვილის დედაა, მილიარდერთან ურთიერთობის შესახებ საჯაროდ საუბრობს. ქალის თქმით, მათი ურთიერთობა ონლაინ მიმოწერით დაიწყო.
The Post-თან ინტერვიუში ეშლი სენტ კლერი მილიარდერზე ღიად საუბრობს და ამტკიცებს, რომ Tesla-ს მფლობელს მათი შვილის არსებობის საიდუმლოდ შენახვა სურდა. მიზეზად მასკს მათი უსაფრთხოება დაუსახელებია.
სენტ კლერმა მასკის მე-13 შვილის სახელის საიდუმლოდ დატოვება ამჯობინა, თუმცა ამბობს, რომ მათი შვილი ბედნიერი და ჯანმრთელია.
26 წლის ინფლუენსერმა ინტერნეტი პარასკევს მას შემდეგ ჩააგდო შოკში, რაც გაამჟღავნა, რომ 5 თვის წინ მასა და მასკს შვილი შეეძინათ. ილონ მასკს ამბის დასადასტურებლად არაერთი გამოცემა დაუკავშირდა, თუმცა ის კომენტარს თავს არიდებს.
როგორც ეშლი The Post-ს უამბობს, პირველად მასკმა მისსავე პლატფორმა X-ზე მისწერა: "ის ჩემთან მიმოწერისას ენამახვილი და ჭკვიანი იყო",- ამბობს გოგონა.
მისივე თქმით, პირველად მილიარდერი 2023 წელს Twitter-ის შტაბ-ბინაში ნახა. იმ დროს ეშლი 24 წლის იყო, მასკი კი 51-ის. ქალის მტკიცებით, პირველი შეხვედრის შემდეგ მათი რომანი მალევე დაიწყო და საბოლოოდ ის დაორსულდა კიდეც. მასკმა ინფლუენსერ ქალს ახლო წრის გარდა ყველასთვის აუკრძალა ამის გამხელა :"მითხრეს, რომ ეს სამუდამოდ საიდუმლოდ უნდა შემენახა".
როგორც ეშლი გამოცემას უყვება, მილიარდერმა მას პრესტიჟულ უბანში მდიდრული ბინა უყიდა და უსაფრთხოების საშუალებებით აღჭურვა, თუმცა სენტ კლერი იძულებული გახადა, რომ ორსულობა მარტოს გაეტარებინა. ახლა ქალი ფიქრობს, რომ მისი და ბავშვის ფსიქიკური ჯანმრთელობისთვის უმჯობესია გაასაჯაროოს პატარას არსებობა. 26 წლის ქალი წუხს, რომ დღემდე შვილის გარეთ გასეირნებასაც ვერ ახერხებდა, მხოლოდ იმის გამო, რომ მისი არსებობა საიდუმლოდ შეენახა.
მიუხედავად ამ ყველაფრისა, სენტ კლერს სურს, რომ მის შვილს ნორმალური ცხოვრება ჰქონდეს: "კარგი დედა ვარ. ყველა გადაწყვეტილებას ჩემი შვილის ბედნიერებისთვის ვიღებ",- ამბობს ის.
წყარო: ambebi.ge
